രജനികാന്ത് ഷങ്കറിനോട് പറഞ്ഞു, ആ നായകനാകാന്‍ കേമന്‍ അജിത്ത്

തമിഴകത്തിന്റെ ഷോ മാന്‍ ഷങ്കറിന്റെ പുതിയ ചിത്രത്തില്‍ അജിത്ത് നായകനാകുന്നുവെന്ന് റിപ്പോര്‍ട്ട്. ഗൗതം മേനോന്റെ ചിത്രത്തിന് ശേഷമായിരിക്കും ഷങ്കര്‍ സംവിധാനം ചെയ്യുന്ന ചിത്രത്തില്‍ അജിത് അഭിനയിക്കുക.

രജനീകാന്തിനോടാണ് ഷങ്കര്‍ ആദ്യം കഥ പറഞ്ഞത്. രജനിക്ക് കഥ ഇഷ്ടമാകുകയും ചെയ്തു. പക്ഷേ, ഷങ്കറിന് രജനീകാന്ത് നല്‍കിയ മറുപടി ഇങ്ങനെയായിരുന്നു - കഥ വളരെ നല്ലതാണ്. അജിത്ത് അഭിനയിക്കുന്നതാകും കൂടുതല്‍ ഉചിതം. തുടര്‍ന്നാണ് ഷങ്കര്‍ അജിത്തിനോട് കഥ പറയുന്നത്. രജനീകാന്തിന്റെ നിര്‍ദ്ദേശം കൂടി പരിഗണിച്ചാണ് അജിത്ത് ചിത്രത്തില്‍ അഭിനയിക്കാന്‍ തയ്യാറാകുന്നത് എന്നുമാണ് കോളിവുഡില്‍ നിന്നുള്ള വാര്‍ത്തകള്‍.

വീരം ആണ് അജിത്തിന്റേതായി ഏറ്റവും ഒടുവില്‍ പ്രദര്‍ശനത്തിന് എത്തിയ ചിത്രം. ഇപ്പോള്‍ അഭിനയിച്ചുകൊണ്ടിരിക്കുന്നത് ഗൗതം മോനോന്റെ ചിത്രത്തിലാണ്. ഈ ചിത്രത്തില്‍ അനുഷ്കയാണ് നായിക. കെ വി ആനന്ദ് ഒരുക്കുന്ന ചിത്രത്തിലും അജിത്ത് നായകനാകുന്നുവെന്ന് റിപ്പോര്‍ട്ടുണ്ട്. അതേസമയം വിക്രം നായകനാകുന്ന ഐ ആണ് ഷങ്കറിന്റേതായി പ്രദര്‍ശനത്തിന് ഒരുങ്ങുന്ന ചിത്രം.  ഈ ചിത്രത്തില്‍ സുരേഷ് ഗോപിയാണ് വില്ലന്‍ കഥാപാത്രത്തെ അവതരിപ്പിക്കുന്നത്.