പ്രണയം തുളുമ്പുന്ന രംഗങ്ങളുമായി ബാല്യകാല സഖി ട്രെയിലര്‍ പുറത്തിറങ്ങി

തിരുവനന്തപുരം: മലയാളിയുടെ വായനാ അനുഭവങ്ങളില്‍ പ്രണയത്തിന്റെയും ദുരന്തത്തിന്റെയും ആഴമുള്ള അടയാളങ്ങള്‍ തീര്‍ത്ത വൈക്കം മുഹമ്മദ് ബഷീറിന്റെ ബാല്യകാല സഖി രണ്ട് ദിവസത്തിനകം തിയറ്ററിലെത്തവേ, ചിത്രത്തിന്റെ ട്രെയിലര്‍ പുറത്തിറങ്ങി. പ്രണയം തുളുമ്പുന്ന സിനിമയുടെ പ്രണയഭരിതമായ ട്രെയിലറാണ് പുറത്തിറങ്ങിയത്.

കുട്ടിക്കാലത്തു നിന്ന് കൌമാരത്തിലേക്കും യൌവനത്തിലേക്കും പില്‍ക്കാലത്തിലേക്കുമുള്ള മജീദിന്റെയും സുഹറയുടെയും വളര്‍ച്ചയും അവരുടെ ജീവിതത്തില്‍ വന്നു പെടുന്ന പ്രണയത്തിന്റെയും ദുരന്തത്തിന്റെയും കടലിളക്കങ്ങളുമാണ് ട്രെയിലറിലുള്ളത്. ഒന്നും ഒന്നും കൂട്ടിയാല്‍ ഇമ്മിണി ബല്യ ഒന്നാവുമെന്ന മജീദിന്‍റെ പറച്ചിലിലൂടെ നീങ്ങുന്ന ട്രെയിലര്‍ മജീദിന്റെയും സുഹറയുടെയും ജീവിതം പകര്‍ത്തുന്നു. മമ്മൂട്ടിയും ഇഷ തല്‍വാറുമാണ് മജീദും സുഹറയുമാവുന്നത്.